कोशी प्रदेशको राजधानी विराटनगरस्थित न्युरो कार्डियो एण्ड मल्टिस्पेशालिटी अस्पतालले सेवा विस्तार र गुणस्तरलाई उच्च प्राथमिकतामा राख्दै आगामी योजना अघि बढाउने घोषणा गरेको छ।
अस्पतालका प्रबन्ध निर्देशक डा. वीरेन्द्रकुमार विष्टले बिहीबार आयोजित पत्रकार सम्मेलनमा अस्पताल स्थापनाकालदेखि नै गुणस्तरीय स्वास्थ्य सेवा प्रवाहमा अडिग रहेको बताए।
रजत जयन्तीका अवसरमा अस्पतालले सप्ताहव्यापी कार्यक्रम सुरु गरेको छ। सो अवसरमा अस्पतालले आफ्नो २५ वर्षे यात्रा प्रस्तुत गर्दै २५ वटा स्वास्थ्य परीक्षण सेवामा २५ प्रतिशत छुटको घोषणा गरेको छ। भदौ ८ गतेदेखि १४ गतेसम्म उपलब्ध हुने यस योजनाबाट सर्वसाधारण लाभान्वित हुनेछन्।
अस्पतालका अपरेसनल डाइरेक्टर राजेश भट्टराईका अनुसार हालसम्म अस्पतालले २५ लाखभन्दा बढी बिरामीलाई सेवा दिइसकेको छ। न्यूरो शल्यक्रिया मात्र ७ हजार ५ सयभन्दा बढी सम्पन्न भएको छ भने ५ हजारभन्दा बढी मुटु सम्बन्धी प्रक्रिया र ६ हजारभन्दा बढी हाडजोर्नी शल्यक्रिया सफलतापूर्वक सम्पन्न भएका छन्।
भट्टराईले अब कोशी र मधेश प्रदेशका तीन नयाँ स्थानमा सेवा विस्तार गर्ने योजना सार्वजनिक गरे। उनले दमकसहित मधेश प्रदेशका दुई स्थानमा विस्तारको तयारी भइरहेको जानकारी दिए।
वि.सं. २०५७ मा बेलायतबाट अध्ययन पूरा गरेर फर्किएका डा. विष्टले ‘न्युरो डाइग्नोष्टिक एण्ड रिसर्च सेन्टर’ को रूपमा यस संस्थाको सुरुआत गरेका थिए। पछि ‘न्युरो हस्पिटल’ हुँदै बहु–सेवा दिने ‘न्युरो कार्डियो एण्ड मल्टिस्पेशालिटी अस्पताल’को रूप लिन सफल भएको थियो।
यसबीच अस्पतालले आधुनिक सिटी स्क्यान, एमआरआई, स्त्री तथा प्रसूति सेवा, न्यूरो सर्जरीलगायत पूर्वमै पहिलोपटक धेरै सेवाहरू सुरु गरी बिरामीलाई राजधानी र भारत धाउनुपर्ने बाध्यता हटाएको विष्टले बताए।
रजत जयन्तीकै अवसरमा अस्पतालले ‘तुलसा देवी फाउण्डेसन’ स्थापना गरेको छ। यसमार्फत हरेक वर्ष कोशी प्रदेशका उत्कृष्ट नर्स र मेडिकल अफिसरलाई ५१ हजार रुपैयाँसहित सम्मान गरिनेछ। साथै, अस्पतालले ब्लड बैंक स्थापना गर्ने र सामुदायिक क्षेत्रमा सरसफाइ, वृक्षारोपण, सीसीटीभी तथा बत्ती जडानजस्ता कार्यसमेत अघि बढाउने योजना जनाएको छ।
हाल १५० बेड क्षमतामा सेवा दिइरहेको अस्पताललाई छिट्टै २५० बेडमा विस्तार गरिने पनि जानकारी दिइएको छ।
