काठमाडौं, भदौ ५ । पर्यटक भिसा लिएर नेपाल आएकी एक फ्रेन्च नागरिकले व्यवसाय सञ्चालन गरेको पाइएको छ।
लैनचौरस्थित अध्यागमन विभागको अनुसार ती महिला “टुरिस्ट” को रूपमा नेपाल आएकी थिइन्, तर काठमाण्डौमै बेकरी र क्याफे सञ्चालन गर्दै आएकी थिइन्।
अध्यागमन विभागले उनीविरुद्ध भिसाको दुरुपयोग गरेको आरोपमा अनुसन्धान अघि बढाएको छ।
विभागका अनुसार, ती महिला सन् २०१४ देखि अहिलेसम्म १५ पटक नेपाल आएकी छन्। प्रारम्भमा विद्यार्थी भिसा लिएर आएकी उनी पछि टुरिस्ट भिसा मार्फत व्यवसायमा संलग्न भएकी हुन्। व्यवसायको नाम “Terra Tsampa” रहेको खुलेको छ।
नेपालको कानुन अनुसार, पर्यटक भिसामा व्यवसाय गर्न पाइँदैन। अध्यागमन विभागका एक अधिकृतका अनुसार, “उनीमाथि आवश्यक कानुनी प्रक्रिया अघि बढाइएको छ।“
कानुनी व्यवस्था अनुसार, विदेशी नागरिकले भिसा नियम उल्लंघन गरेमा रु ५० हजारसम्म जरिवाना, डिपोर्ट, वा नेपाल प्रवेशमा प्रतिबन्ध लगाउन सकिने व्यवस्था छ।
