ललितपुर, भदौ ९ – नेपाल कम्युनिष्ट पार्टी (माओवादी केन्द्र)का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ले नेपाल पर्वतारोहण संघ (एनएमए)को नवनिर्वाचित कार्यसमितिलाई हार्दिक बधाई ज्ञापन गर्नुभएको छ।
खुमलटारस्थित निजी निवासमा आयोजित कार्यक्रममा अध्यक्ष प्रचण्डले अध्यक्ष फुर्वा गेल्जे शेर्पा नेतृत्वको प्यानललाई बधाई दिँदै पर्वतीय पर्यटनको विकासका लागि संघको भूमिका महत्वपूर्ण रहने विश्वास व्यक्त गर्नुभयो।
“नेपालमा पर्वतीय पर्यटन व्यवसायलाई अझै विस्तार र व्यवस्थित गर्नुपर्छ। निर्वाचित अध्यक्षलगायत सम्पूर्ण पदाधिकारीलाई म हार्दिक बधाई दिन्छु। संघलाई सशक्त र प्रभावकारी बनाउने तपाईंहरूको भूमिकामा मेरो पूर्ण समर्थन रहनेछ,” अध्यक्ष प्रचण्डले भन्नुभयो।
अध्यक्ष प्रचण्डले आफ्नो व्यक्तिगत अनुभव र संघसँगको लामो सम्बन्धलाई स्मरण गर्दै सरकारले पर्यटन प्रवर्द्धनमा सक्रिय भूमिका खेल्ने प्रतिवद्धता पनि जनाउनुभयो। उहाँले अन्तिम चरणमा पुगेको पर्यटन सम्बन्धी विधेयक पारित गराउन पहल गर्ने आश्वासन समेत दिनुभयो।
एनएमएको हालै सम्पन्न निर्वाचनमा अध्यक्ष शेर्पा नेतृत्वको प्यानल विजयी बनेको छ। एक उपाध्यक्ष र एक सदस्य बाहेकका सबै पदमा सोही प्यानलका उम्मेदवार निर्वाचित भएका छन्।
