काठमाडौं, भदौ ८। नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले समाजवादको यात्राको आधार उत्पादन हुने बताउनुभएको छ।
पार्टी केन्द्रीय कार्यालय पेरिसडाँडामा आज सम्पन्न आर्थिक उत्पादन विभागको पहिलो बैठकलाई सम्बोधन गर्दै अध्यक्ष प्रचण्डले समाजवाद सम्भव बनाउन उत्पादन सघर्ष अपरिहार्य भएको उल्लेख गर्नुभयो। उहाँले भन्नुभयो, “हामी समाजवादतर्फ जाँदैछौं भने यसको मूल आधार उत्पादन हो। पार्टी सिँगो उत्पादन सघर्षमा केन्द्रित नभए समाजवाद सम्भव हुँदैन।”
उहाँले पार्टीलाई रुपान्तरण गर्न उत्पादनमुखी नीतिलाई प्राथमिकता दिइएको स्पष्ट पार्नुभयो। साथै, कतिपय नेताहरू दलाल पुँजीवाद, बिचौलिया र चन्दा प्रवृत्तिमा फस्दा जनविश्वास कमजोर भएको भन्दै तत्काल सच्याउनुपर्ने आवश्यकता औंल्याउनुभयो।
हेटौंडा महाधिवेशनले लिएको “युद्ध होइन, उत्पादन संघर्ष” भन्ने निर्णय कार्यान्वयनमा ल्याउन ढिलाइ भएको स्वीकार गर्दै अध्यक्ष प्रचण्डले अब पार्टी जनतासँग प्रत्यक्ष जोडिने, समुदायमा फर्किने र उत्पादन अभियानलाई अगाडि बढाउने घोषणा गर्नुभयो।
उहाँले कृषि, उद्योग, जडीबुटी र पर्यटनजस्ता स्थानीय स्रोतमा आधारित आत्मनिर्भर अर्थतन्त्र समाजवादको भ्रूण हुने बताउँदै सहकारी आन्दोलनलाई जनमुखी र समाजवादी मार्गमा अघि बढाउनुपर्नेमा जोड दिनुभयो।
दलाल, नोकरशाही र बिचौलियाविरुद्ध सरकारमा रहँदा पनि लडाई लडिएको स्मरण गर्दै प्रचण्डले भने, “तेस्ता प्रवृत्ति माओवादी केन्द्रमा धेरै दिन रहिरहन सक्दैनन्। हाम्रो पार्टी नै रुपान्तरणकारी समाजवाद निर्माण गर्ने एक मात्र सम्भावना बोकेको पार्टी हो।”
बैठकमा पार्टी उपाध्यक्ष बहादुर पुन ‘पासाङ’ले विभाग र संयन्त्रको अवधारणा प्रस्तुत गर्नुभयो भने केन्द्रीय सदस्य सरदसिंह भण्डारीले कार्यविधि प्रस्तुत गर्नुभएको थियो।
