दुहबी, ४ भदौ ।
सुनसरीको दुहबी नगरपालिकाले आफ्नो क्षेत्रमा रहेका शारीरिक अपाङ्गता भएका व्यक्तिहरूलाई सहज जीवनयापनका लागि विभिन्न सहायक सामग्री वितरण गरेको छ।
नगरपालिकाको स्वास्थ्य शाखा र करुणा फाउन्डेशनको सहकार्यमा आयोजित कार्यक्रममा दुहबी नगर प्रमुख बेद गच्छदारले सहायक सामग्री हस्तान्तरण गरेका थिए।
यस क्रममा अपाङ्गता भएका ३८ जनालाई ३८ थान सामग्री वितरण गरिएको थियो। जसअन्तर्गत L-stick १० थान, व्हील चेयर ७ थान, ट्वाइलेट चेयर ३ थान, ह्वाइट केन ५ थान, वाकर ८ थान, हेयरिङ एड ८ थान र बैशाखी २ थान रहेका छन्।
कार्यक्रमलाई सम्बोधन गर्दै नगर प्रमुख गच्छदारले अपाङ्गता भएका व्यक्तिलाई समाजले हेर्ने हेय दृष्टिकोण हटाउन र सपाङ्गजस्तै समान व्यवहार, माया र आदर सम्मान गर्नुपर्ने संदेश समुदायमा पु¥याउन यस्तो कार्यक्रम गरिएको बताए।
“शारीरिक अपाङ्गता पूर्वजन्मको फल होइन, गर्भावस्थामा कुपोषण वा अन्य कारणले हुन सक्छ,” भन्दै उनले नगरपालिकाले विवाह भएको दिनदेखि नै स्वास्थ्य शाखा र स्वास्थ्य स्वयंसेविकामार्फत मातृ स्वास्थ्यमा निगरानी गर्ने, गर्भावस्थामा जाँच र पोषणको व्यवस्था गर्ने तथा जन्मदेखि नै सुनौला हजार दिन कार्यक्रममार्फत खोप तथा अन्य सेवा दिँदै आएको बताए।
त्यस्तै, अपाङ्गता भएका व्यक्तिहरूलाई आत्मनिर्भर बनाउन सीपमूलक तालिम तथा समूहगत रूपमा ५० हजार रुपैयाँसम्म बीउ पुँजी उपलब्ध गराउँदै स्वरोजगारको बाटो खोलिएको उनले जानकारी दिए। साथै, नगरपालिकाले स्वास्थ्य बीमामा रु. ५ सय तिर्दा २ लाखसम्मको उपचार खर्च गर्न सक्ने व्यवस्था मिलाइसकेको बताए।
सामग्री प्राप्त गरेपछि अपाङ्गता भएका व्यक्तिहरू भावुक बनेका थिए। उनीहरूले आँसुका साथ नगर प्रमुखलाई धन्यवाद दिँदै आगामी दिनमा पनि यस्ता महान् कार्यलाई निरन्तरता दिन आग्रह गरे।
कार्यक्रममा उपप्रमुख मेनुका खतीवडा, स्वास्थ्य शाखाका बिन्देश्वर महतो, उचितनारायण साह, करुणा फाउन्डेशनका प्रतिनिधि लगायतको उपस्थिति थियो।
