बिराटनगर ,१ भाद्र २०८२ / कोशी प्रदेशको राजधानी विराटनगरको ऐतिहासिक तथा साँस्कृतिक गौरवको प्रतीकका रूपमा रहेको रथयात्राको अवसरमा कोशी प्रदेश एवम् स्वदेश तथा विदेशमा रहनुभएका नागरिकहरूमा हार्दिक शुभकामना व्यक्त गर्दछु ।
कोशी प्रदेश विविधतायुक्त प्रदेश हो । यो प्रदेशको राजधानी विराटनगरमा वषौंदेखि मनाउँदै आइएको रथयात्राले प्रदेशको गौरव मात्र बढाएको छैन, यसले हाम्रो साँस्कृतिक परम्परा र रीतिरिवाजलाई पनि बलियो बनाएको छ। श्रीकृष्ण जन्माष्टमीको भोलिपल्ट नेपालकै सबैभन्दा ठूलो रथयात्राका रूपमा विराटनगरमा निस्कदै आएको रथयात्रा अत्यन्तै महत्वपूर्ण छ। कोशी प्रदेशका विभिन्न भागमा अहिले रथयात्राको प्रचलन फैलिदै गएको छ। यसले हाम्रो साँस्कृतिक पर्वलाई बलियो बनाउँदै लगेको मैले महसुस गरेको छु। यो रथयात्रा केवल धार्मिक श्रद्धाको मात्र परिचायक नभएर हाम्रो सामाजिक एकता, सहिष्णुता र साझा संस्कृतिको अनुपम उदाहरण पनि हो ।
वि.सं. १९८८ सालमा खटयात्राको रूपमा सुरु भई वि.सं. २०२४ सालदेखि रथयात्राको रूपमा निरन्तर सञ्चालन हुँदै आएको यसले विराटनगर मात्र होइन, सम्पूर्ण प्रदेशकै पहिचानलाई उजागर गर्दै हामीवीचको एकतालाई बलियो बनाएको छ। कोशी प्रदेश सरकार सबै जातजाति, धर्म, संस्कृति, परम्परा र चाडपर्वहरूलाई संरक्षण र प्रवर्धन गर्न प्रतिवद्ध छ। बहुभाषिक, बहुजातिय र बहुसाँस्कृतिक विविधताले भरिपूर्ण हाम्रो प्रदेशलाई हाम्रा पर्वहरूले साँस्कृतिक रुपमा समृद्ध बनाएका छन्। “समृद्ध नेपाल, सुखी नेपाली” को राष्ट्रिय आकांक्षालाई प्राप्त गर्न पनि हाम्रा परम्परा र पर्वहरुले महत्वपूर्ण भूमिका खेल्न सक्दछन्। कोशी प्रदेश सरकारले पर्यटनका माध्यमबाट रोजगारी र राष्ट्रिय पूँजीको विकास गर्नका निम्ति पर्यटन वर्ष मनाइरहेको छ। यसको महत्वपूर्ण पाटो हाम्रो साँस्कृतिक विविधता पनि हो। पर्यटन वर्षलाई प्रवर्धन गर्नका लागि पनि यस्ता धार्मिक र साँस्कृतिक पर्वहरुले उल्लेख्य योगदान गर्ने मैले महसुस गरेको छु। नेपाल र भारतका विभिन्न स्थानबाट आउनु हुने भक्तजनहरूको सहभागिताले पनि यस रथयात्रालाई अझ भव्य र महत्त्वपूर्ण बनाएको छ।
रथयात्राले हामीलाई परम्परागत धार्मिक संस्कारसँगै समृद्ध साँस्कृतिक मूल्यहरूको संरक्षण र प्रवर्द्धन गर्न प्रेरित गर्ने विश्वास लिएको छु। यसले हाम्रो आपसी एकता, भाइचारा र सामाजिक सद्भावलाई बलियो बनाउन महत्वपूर्ण भूमिका खेल्ने अपेक्षासहित रथयात्राको भव्य सफलताको कामना गर्दछु ।
