काठमाडौं । विशेष अदालतले सर्लाहीको बागमती नगरपालिकास्थित भरत ताल निर्माणमा भ्रष्टाचार भएको ठहर गर्दै बागमती नगरपालिकाका निलम्बित मेयर भरत थापालाई ८ वर्ष कैद र १० करोड रुपैयाँ जरिवानाको सजाय सुनाएको छ ।
२१ साउनमा विशेष अदालतले मेयर थापा, नगरपालिकाका कर्मचारीहरू विमलकुमार पोखरेल र सागर पौडेललाई ताल निर्माणका क्रममा नदीजन्य पदार्थ (ढुंगा, गिटी, बालुवा) हिनामिना गरेको प्रमाणित गर्दै दोषी ठहर गरेको थियो ।
थापासहित तीनजनालाई सजाय तोकेको छ भने बाँकी प्रतिवादीलाई सफाइ दिइएको छ । थापाले भ्रष्टाचार निवारण ऐन, २०५९ को दफा २० को उपदफा (१) अनुसार गैरकानुनी सम्पत्ति आर्जन गरेको अदालतको ठहर छ । साथै, पीडित राहत कोषमा ४० लाख ३९ हजार १३१ रुपैयाँ क्षतिपूर्ति बुझाउन पनि आदेश भएको छ ।
२०७९ वैशाखमा सम्पन्न स्थानीय तह निर्वाचनमा थापा नेकपा (माओवादी केन्द्र)बाट उम्मेदवार भई मेयर निर्वाचित भएका थिए ।
