मोरङ क्षेत्र नम्बर ३ को चुनावी माहोलबीच डा. सुनिल शर्मा र ईरान राई बीच सौहार्दपूर्ण भेटघाट सम्पन्न भएको छ। नेपाली कांग्रेसका उम्मेदवार शर्मा र नेकपा एमालेका उम्मेदवार राईबीच शर्माको निवासमा भएको भेटले राजनीतिक प्रतिस्पर्धाभन्दा माथि उठेर आपसी सम्मान र लोकतान्त्रिक संस्कारको उदाहरण प्रस्तुत गरेको छ।
भेटका क्रममा डा. शर्माका बुवा लोकनाथ न्यौपाने र आमा होमादेवी न्यौपानेले दुबै उम्मेदवारलाई आशिर्वाद प्रदान गर्दै स्वस्थ प्रतिस्पर्धा, जनताको सेवा र देशप्रतिको जिम्मेवारी सफलतापूर्वक पूरा होस् भन्ने शुभकामना व्यक्त गर्नुभयो। चुनावी प्रतिस्पर्धाका बीच देखिएको यो आत्मीय क्षणलाई स्थानीयले सम्मान, संस्कार र मानवीय सम्बन्धको सुन्दर उदाहरणका रूपमा लिएका छन्।
