लमजुङ, मध्यनेपाल – मध्यनेपाल नगरपालिका वार्ड नं.-७, रमाइलो डाँडाका कृषक पूर्णचन्द्र पोखरेल अकबरे खुर्सानीको सफल खेतीपछि अब सो उत्पादनलाई बजारमा निर्यात गर्ने तयारीमा छन्।
लमजुङको न्यु भिजन एग्रीकल्चर फर्मका सञ्चालक समेत रहेका पोखरेलले व्यावसायिक कृषि गर्दै आइरहेका छन्। उनले हालै परिपक्व भएका अकबरे खुर्सानी टिप्न थालेका छन्, जुन विशेषगरी स्वाद, तिखोपन र औषधीय गुणका कारण बजारमा अत्यन्तै माग भएको बाली मानिन्छ।
“स्थानीयस्तरमा मात्र सीमित नराखी यो उत्पादनलाई ठूला बजारतर्फ विस्तार गर्ने योजना छ,” पोखरेलले बताए। उनको फर्मले जैविक विधिबाट उत्पादन गरेको अकबरे खुर्सानीले गुणस्तरमा पनि ध्यान दिएको छ।
उनले आफूजस्ता कृषकलाई स्थानीय सरकार र नीति निर्माताले प्रविधि, बजारीकरण र तालिममार्फत अझ सहयोग गर्नु पर्नेमा जोड दिएका छन्।
तस्वीर: सुरज गुरुङ / लमजुङ न्यूज
