जुगेश दास । सुनसरी विराटनगरबाट बर्जु–४ जाने क्रममा बाटो विग्रिएका कारण बर्जु गाउँपालिका वडा नं. ४ हरवनी निवासी तथा हाल नोवेल मेडिकल कलेजको इमर्जेन्सी वार्डमा कार्यरत विजय कुमार चौधरी हिजो राति १२ बजे गम्भीर दुर्घटनामा परेका छन्। मोटरसाइकलमा सवार चौधरी दुधुवा पुलनजिकैको ठूलो खाल्डोमा पसेपछि दुर्घटनामा परेका हुन्।
स्थानीयवासीका अनुसार सो स्थानमा पटक–पटक दुर्घटना हुने गरेको छ। ठूलो खाल्डोका कारण प्रायः यात्रुहरू घाइते हुने क्रम रोकिएको छैन। विराटनगर कोशी प्रदेशको राजधानी बने पनि यहाँका सार्वजनिक सडकहरू भने राजधानीको हैसियतअनुरूप छैनन्। दैनिक सयौं सवारी आवतजावत हुने बाटो वर्षौँदेखि जिर्ण अवस्थामा रहे पनि जिम्मेवार निकाय भने उदासीन देखिन्छ।
विराटनगर महानगरपालिका वडा नं. ६ मा पर्ने दुधुवा खोलानजिकैको सडक खण्ड विशेषतः यात्रुहरूका लागि ‘मृत्युकुप’ सावित हुँदै आएको छ। तर स्थानीय सरकार, नगरप्रमुखदेखि वडा अध्यक्षसम्मले चासो दिएको पाइँदैन। सडक मर्मतमा करोडौं बजेट खर्चिएको दाबी गर्ने महानगरको वास्तविकता भने खाल्डाखुल्डी र धुलाम्मे बाटोमै सीमित छ।
जनताको जीवनसँग खेलबाड भइरहेको यस्ता खाल्डाखुल्डी सडकबारे स्थानीय सरकारले तत्काल चासो नदिए सडकले अझै कैयौं यात्रुलाई अस्पताल पु-याउने वा जीवन नै खोस्ने खतरा बढ्दो छ। वडा अध्यक्ष र महानगरका जनप्रतिनिधि केवल प्रचारको नाममा फोटो खिच्न व्यस्त देखिँदा विराटनगरका सडक ‘दुर्घटनाको फन्दामा’ परिणत भएका छन्।
