विराटनगर, श्रावण ३० । विराटनगर–५ स्थित किड्स भिलेज स्कूलमा शुक्रबार श्रीकृष्ण जन्माष्टमी भव्य रूपमा मनाइएको छ। विद्यार्थीहरूले नाटक, भजन–कीर्तन, झूला झुलाउने लगायत कार्यक्रम प्रस्तुत गरी विद्यालय परिसरलाई भक्तिमय बनाएका थिए।
कार्यक्रममा विद्यार्थीहरूले मथुरा नगरीका अत्याचारी राजा कंसको कारागारमा देवकी र वासुदेवका पुत्रका रूपमा भगवान श्रीकृष्णको जन्म भएको कथा नाटकमार्फत प्रस्तुत गरे। नाटकमा श्रीकृष्णले धर्मको स्थापना गर्दै अधर्मको विनाश गरेको प्रसङ्गलाई पनि समेटिएको थियो।
विद्यालयका विद्यार्थी दाजुभाइ र दिदीबहिनीहरूले व्रत बसेर भजन–कीर्तनमा सहभागिता जनाए। साथै श्रीकृष्णलाई झूला झुलाइ आरतीसमेत गरिएको थियो।
विद्यालयका म्यानेजिङ डाइरेक्टर पंकज जैनले भने, “यस्ता धार्मिक तथा सांस्कृतिक कार्यक्रमले विद्यार्थीलाई भक्ति, सत्कर्म र समाजप्रतिको उत्तरदायित्व सिकाउँछ।”
त्यस्तै, एकेडेमिक डाइरेक्टर निरु पौडेलले कार्यक्रमले विद्यार्थीमा धर्म, भक्ति र संस्कारबारे गहिरो ज्ञान दिने बताइन्। प्रिन्सिपल विजय दाहालका अनुसार यसले विद्यार्थीमा नैतिक मूल्य र सांस्कृतिक चेतना विकासमा सकारात्मक योगदान पुर्याएको छ।
