बर्जु (सुनसरी) । सुनसरी जिल्लाको सदरमुकामबाट करिब २७ किलोमिटर दक्षिणमा पर्ने बर्जु गाउँपालिका–१, बुग्डहरीस्थित श्री लक्ष्मी आधारभूत विद्यालय परिसरमा आइतबार दिउँसो करिब १ बजे विषालु सर्प फेला परेको छ । समयमै उद्धार गरिएकाले ठूलो मानवीय क्षति हुनबाट जोगिएको छ ।
विद्यालय परिसरमा सर्प देखिएपछि विद्यालयकी प्रधानाध्यापक इन्दिरा फुयालले तत्कालै विपद् व्यवस्थापन शाखा प्रमुख गणेश चापागाईंलाई जानकारी गराउनुभएको थियो। चापागाईंले सर्पलाई नछोई सुरक्षित दूरीबाट निगरानी गर्न आग्रह गर्दै १०–१५ मिनेटभित्र उद्धारकर्ता पठाइने जानकारी दिनुभएको थियो । त्यस अवधिमा विद्यालय परिवारले सतर्कता अपनाउँदै सर्पको निगरानी गरेको थियो ।
साथै विद्यालयका सूचना अधिकारीले शिक्षा शाखा प्रमुख हेमराज दाहालसँग पनि सम्पर्क गरेका थिए। शिक्षा शाखाको समन्वयमा सुनसरी जिल्लामा कार्यरत एकमात्र सर्प उद्धारकर्ता इन्द्र पोखरेललाई तुरुन्तै बोलाइएको थियो । हाल बर्जु गाउँपालिका–६ मा कार्यरत पोखरेलले १०–१५ मिनेटभित्र विद्यालय पुग्ने जानकारी दिएका थिए ।
उद्धारकर्ता पोखरेल वडाबाट आएका विकास नाम गरेका एक प्रतिनिधिसहित विद्यालय पुगेपछि करिब २०–२५ मिनेटको खोजतलासपछि सर्प फेला पारिएको थियो। उद्धारकर्ताका अनुसार उक्त सर्प भारतीय प्रजातिको करिब १२ वर्ष पुरानो अत्यन्तै विषालु रहेको छ ।
घटनापछि विद्यालय प्रशासनले समयमै सहयोग र समन्वय गरेकोमा शिक्षा शाखा प्रमुख हेमराज दाहाल तथा विपद् व्यवस्थापन शाखा प्रमुख गणेश चापागाईंलाई धन्यवाद व्यक्त गरेको छ ।
तर घटनासँगै एक गम्भीर विषय पनि बाहिर आएको छ। सर्प उद्धारकर्ता पोखरेलले हालसम्म सर्प उद्धारका लागि आवश्यक सुरक्षात्मक सामग्री र उपकरण विपद् व्यवस्थापन शाखाबाट उपलब्ध नगराइएको गुनासो गरेका छन् । यस्ता जोखिमपूर्ण उद्धार कार्यमा आवश्यक सामग्रीको अभावले मानव जीवनमा ठूलो खतरा निम्त्याउन सक्ने भन्दै स्थानीय सरोकारवालाले सम्बन्धित निकायको ध्यानाकर्षण गराएका छन् ।
