विराटनगर, १२ भदौ । नेपाल-भारत सीमा विवादको संवेदनशील विषय कालापानी र लिपुलेकबारे पहिलो पटक औपचारिक तथा सार्वजनिक रूपमा सिधासिधा कुरा गर्ने प्रधानमन्त्री आफू नै भएको दाबी नेकपा माओवादी केन्द्र का अध्यक्ष पुष्पकमल दाहाल ‘प्रचण्ड’ले गर्नुभएको छ ।
विराटनगरमा सम्पन्न काेशी प्रदेश समिति सचिवालय बैठकलाई सम्बोधन गर्दै प्रचण्डले भने, “पछिल्लो पटक प्रधानमन्त्रीको हैसियतमा भारत भ्रमणमा जाँदा कालापानी र लिपुलेकको विषयमा गम्भीर छलफल गरी, इतिहासमै पहिलो पटक मेरो नेतृत्वमा रहेको सरकारले भारतीय प्रधानमन्त्री मोदीलाई सीमा समस्या संवादबाट समाधान गर्ने सहमति गराएर सार्वजनिक घोषणा गराएको हो। यसबारे जनतालाई पनि बुझाउनुपर्छ ।
उहाँले सरकारको सकारात्मक कदमबारे जनतालाई जानकारी दिन पार्टीका कार्यकर्ताहरू सक्रिय हुनुपर्ने आवश्यकता औंल्याउनुभयो । “हाम्रा उपलब्धिहरू कार्यकर्ताले नबोल्दा संगठनमा विकृति आउँछ,” प्रचण्डले जोड दिनुभयो ।
बैठकमा पार्टीभित्र बढ्दो वैचारिक अराजकता र अनुशासनहीनताप्रति चिन्ता व्यक्त गर्दै अध्यक्ष प्रचण्डले आलोचना र आत्मसमिक्षालाई संगठन सुदृढीकरणको आधारका रूपमा लिनुपर्ने धारणा राख्नुभयो । उहाँले भन्नुभयो, “समाजवादको तयारीका लागि हामीले अझ गहिरो वैचारिक बहस र राजनीतिक संघर्ष पार गर्नुपर्छ। मार्क्सवादको मूल तत्व नै आलोचना र आत्मसमिक्षा हो ।”
काेशी प्रदेश लाई “अग्रगामी चेतनाको स्रोत” का रूपमा व्याख्या गर्दै प्रचण्डले यहाँका कार्यकर्ताहरूको आलोचनात्मक चेतना पार्टीको विकासका लागि सकारात्मक संकेत भएको उल्लेख गर्नुभयो । साथै, पार्टी विभाजनपछि पुनः फर्किएका नेताकार्यकर्तालाई सम्मानपूर्वक स्वागत गर्न निर्देशन दिँदै उहाँले होच्याउने, हेला गर्ने प्रवृत्ति अन्त्य गर्न आग्रह गर्नुभयो ।
बैठकमा संगठन सुदृढीकरण, वैचारिक बहस तथा समसामयिक राजनीतिक चुनौतीबारे गहन छलफल गरिएको जनाएको छ ।
