विराटनगर । हालै सम्पन्न एक भेटघाट कार्यक्रममा सहभागी भारतीय नेताहरुले नेपाल-भारतबीचको मैत्रीपूर्ण सम्बन्धलाई अझ मजबुत बनाउन आफूहरु निरन्तर तत्पर रहेको बताएका छन्। उक्त कार्यक्रममा भारततर्फका सांसद तथा नेताहरुले दुई देशबीचको राजनीतिक सम्बन्धलाई अझै प्रगाढ बनाउन सकिने उल्लेख गर्दै सामाजिक, सांस्कृतिक तथा आर्थिक क्षेत्रमा समेत सहकार्यको सम्भावना रहेको धारणा व्यक्त गरे।
सांसद प्रदीप कुमार सिंहले नेपाल र भारतबीचको सम्बन्धलाई केवल राजनीतिक तहमा मात्र सीमित नराखी जनस्तरमा समेत विश्वास र सहकार्य बढाउनु जरुरी रहेको बताए। उनका अनुसार दुई देशबीचको सामाजिक, सांस्कृतिक आदानप्रदान र आर्थिक सहकार्य विस्तारले दीर्घकालीन सम्बन्धलाई सबल बनाउन सक्नेछ।
त्यसैगरी नेपाली युवा नेताहरु नेपाली कांग्रेसका अभिषेक गिरी र नेकपा एकीकृत समाजवादीका केन्द्रीय सदस्य अलम लगायतकाले पछिल्ला वर्षमा दिल्ली लगायत भारतका विभिन्न शहरमा आयोजना हुने राजनीतिक संवाद, वैचारिक छलफल तथा आदान-प्रदान कार्यक्रममा सक्रिय सहभागिता जनाउँदै आएका छन्। उनीहरुको सक्रियता निरन्तर बढ्दै गएको देखिएको छ।
विशेषगरी नयाँ पुस्ताका युवा नेताहरुले नेपाल-भारतबीचको सम्बन्धलाई अझ गहिरो र विश्वासपूर्ण बनाउन निरन्तर पहल गरिरहेका छन्। उनीहरुको सक्रियताले दुवै देशबीचको सम्बन्धलाई समयानुकूल र दीर्घकालीन बनाउन महत्वपूर्ण भूमिका खेल्ने अपेक्षा गरिएको छ।
