सुनसरी // ज्ञानेन्द्र बहादुर कार्कीले आगामी फागुन २१ गते हुने निर्वाचनपछि देशमा कांग्रेस नेतृत्वको सरकार बन्ने दाबी गरेका छन्। सुनसरी निर्वाचन क्षेत्र नं. ४ का नेपाली कांग्रेस उम्मेदवारसमेत रहेका कार्कीले देशभरको राजनीतिक माहोल कांग्रेसको पक्षमा उन्मुख भएको जिकिर गरे।
हरिनगर गाउँपालिका-१ वडा कार्यसमितिले आयोजना गरेको चुनावी कार्यक्रममा बोल्दै उनले आफूलाई अनुभवी र सबैलाई मिलाएर लैजान सक्ने नेताको रूपमा प्रस्तुत गरे। “बारम्बार सरकार फेरिँदा विकास निर्माण प्रभावित भयो,” उनले भने, “अब स्थिर, समावेशी र जिम्मेवार सरकार आवश्यक छ, त्यो क्षमता कांग्रेससँग छ।”
कार्कीले सुनसरी-४ मा पछिल्ला वर्षहरूमा सडक, शिक्षा, स्वास्थ्य, खानेपानी र सिँचाइ क्षेत्रमा भएको प्रगति उल्लेख गर्दै २०७४ अघिको अवस्थाभन्दा अहिले स्पष्ट सुधार देखिएको दाबी गरे। आगामी दिनमा अझ तीव्र गतिमा विकास अघि बढाउने उनको प्रतिबद्धता थियो।
उनले राजनीतिक स्थायित्व, आर्थिक सुधार, रोजगारी सिर्जना, कृषिको आधुनिकीकरण र सुशासनलाई आफ्नो प्राथमिकता बताए। युवालाई स्वदेशमै अवसर, किसानलाई प्राविधिक सहयोग र बजार सुनिश्चितता दिलाउने तथा स्थानीय तहसँग समन्वय गरेर सन्तुलित विकास गर्ने प्रतिवद्धता व्यक्त गरे।
कार्यक्रममा सहभागी स्थानीय नेता–कार्यकर्ताले एकजुट भएर कांग्रेस उम्मेदवारलाई विजयी गराउने प्रतिबद्धता जनाएका थिए। अन्त्यमा कार्कीले लोकतन्त्र सुदृढीकरण र स्थिर सरकार गठनका लागि विवेकपूर्ण मतदान गर्न मतदातासँग आग्रह गरे।
