इटहरी । राष्ट्रिय स्वतन्त्र पार्टीका उम्मेदवार अशोक कुमार चौधरीले रास्वपालाई दुई तिहाई मत नदिनेहरु देशविरोधी भएको बताएका छन् । सुनसरी क्षेत्र नं. ३ का रास्वपा उम्मेदवार चौधरीले आज इटहरीमा आयोजित ककस कार्यक्रममा आफुलाई मत नदिनेहरुलाई देशद्रोहीको संज्ञा दिए ।
इटहरी जेसिजद्वारा आयोजित कार्यक्रममा बोल्दै रास्वपा उम्मेदवार अशोक कुमार चौधरीले फागुन २१ गते हुन गइरहेको निर्वाचनमा आफ्नो पार्टीलाई दुई तिहाईको मत नदिने जनताहरु देशद्रोही रहेको जिकीर गरेका हुन् ।
‘राष्ट्रिय स्वतन्त्र पार्टीले यो चुनाबमा दुई तिहाई मागिरहेको छ । यदी तपाईहरु दुई तिहाई पुर्याउन लाग्नु हुन्न भने, एक भन्दा बढी अस्थिर सरकार चाहिरहनु भएको छ भने तपाई देश विरोधी हो ।’ चौधरीले भनेका छन् ।
रास्वपा उम्मेदवार चौधरीले सार्वजनिक कार्यक्रमबाटै मतदाताहरुलाई देश बिरोधी भनेपछि चर्को विरोध र नाराबाजी भएको थियो । आफुहरुलाई देशद्रोहीको संज्ञा दिएपछि कार्यक्रम हेर्न आएका स्थानीयहरुले रास्वपा र उनका उम्मेदवारको विरुद्धमा चर्को नाराबाजी गरेका थिए । ककस कार्यक्रममा सहभागी उम्मेदवारहरुले समेत चौधरीले दिएको अभिव्यक्ति संविधान विरोधी भएको बताएका छन् ।