सुनसरी : सुनसरी संघिय निर्वाचन क्षेत्र नं.-४ काे राहक्षेत्रमा यतिबेला चुनावी माहोल उत्साहजनक बनेको छ। ज्ञानेन्द्र बहादुर कार्कीको पक्षमा जेन-जी पुस्तासहित युवा, बुद्धिजीवी र परिवर्तन चाहने मतदाताको खुला समर्थन देखिन थालेपछि सुनसरी क्षेत्र नं.-४ को प्रतिस्पर्धा एकतर्फी बन्दै गएको विश्लेषण गरिएको छ। घरदैलो अभियानमा युवाहरूको उल्लेख्य सहभागिताले कार्कीको तेस्रो पटकको जित लगभग सुनिश्चितजस्तै देखिएको स्थानीय आकलन छ।
नेपाली कांग्रेसका प्रभावशाली र अध्ययनशील नेताका रूपमा चिनिने कार्कीले पार्टी संगठनभित्र एकता, समन्वय र विचारको राजनीति अघि बढाउँदै आएका छन्। संगठनलाई माया गर्ने, नीतिगत बहसमा सक्रिय रहने र राष्ट्रिय मुद्दामा स्पष्ट धारणा राख्ने नेताका रूपमा उनको छवि स्थापित छ।
क्षेत्र नं.-४ को विकासमा पक्षपात गरेको भन्ने आरोप एक पक्षबाट लागे पनि अर्काे पक्षले भने अघिल्ला प्रतिनिधिहरूको तुलनामा पूर्वाधार, शिक्षा, स्वास्थ्य र सामाजिक विकासका क्षेत्रमा उल्लेख्य काम भएको दाबी गरेको छ। सडक स्तरोन्नति, सामुदायिक संरचना विस्तार र सेवा प्रवाह सुधारमा कार्कीको सक्रियता मतदातामाझ सकारात्मक रूपमा प्रस्तुत भइरहेको छ।
युवामाझ बढ्दो आकर्षण, संगठनभित्रको मजबुत पकड र विकासका आधारमा मत माग्ने आत्मविश्वासका कारण सुनसरी-४ मा कार्कीको जितको आधार झन् बलियो बन्दै गएको राजनीतिक विश्लेषकहरूको भनाइ छ। विपक्षी दलका आलोचनाबीच पनि जनतामाझ देखिएको उत्साहले यसपटकको निर्वाचनमा कार्कीलाई पुनः विजयतर्फ अग्रसर गराएको संकेत स्पष्ट देखिएको छ।
