सुनसरी । नेकपा (एमाले) की प्रभावशाली नेतृ भगबती चौधरीले सुनसरी क्षेत्र नं. ३ लाई मुलुककै उत्कृष्ट १० नमुना क्षेत्रको रुपमा विकास गर्ने आफ्नो अभिलाषा रहेको बताउनु भएको छ । सुनसरी जिल्लाका प्राध्यापक, बुद्धिजिवी, समाजसेवीहरुसँगको अन्तरक्रिया गर्दै फागुन २१ गते हुन गइरहेको प्रतिनिधि सभा सदस्य उम्मेदवार चौधरीले सुनसरी क्षेत्र नं. ३ लाई मुलुककै १० नमुना क्षेत्र मध्ये एउटा नमूना क्षेत्रका रुपमा विकास गर्ने आफ्नो लक्ष्य रहेको बताउनु भएको हो ।
इटहरीमा आयोजित अन्तरक्रियामा सहभागी हुँदै उम्मेदवार चौधरीले २०७९ सालको निर्वाचन जितेर गएपछि आफ्नो क्षेत्रको विकासका लागि साढे तीन वर्षको अवधिमा करिब सवा अर्बको विकास बजेट ल्याएको र अब पुनः निर्वाचन जितेर गए आफ्नो क्षेत्रको कायापलट हुनेगरी विकास गर्ने प्रतिबद्धता व्यक्त गर्नुभयो । ‘साढे तीन वर्षको अवधिमा झण्डै सवा अर्बको बजेट ल्याउन सफल भएँ, १६ वटा योजनाहरु त बाटो र पुलमै परेका छन् । कतिपय योजनाहरु निर्माण चरणमा छन् । ५ वर्षसम्मै सांसद रहन पाएको भए र एकाध वर्ष मात्रै मन्त्री बन्न पाएको भए अझ धेरै काम गर्न सक्थे ।’ पुनः निर्वाचित भएर गएको खण्डमा विगतका अधुरा काम गर्ने तथा युवाहरुका लागि आफ्नै क्षेत्रमा रोजगारी सिर्जना गर्ने उहाँको जिकीर छ ।
चौधरीले करिब साढे तीन वर्षको संसदीय यात्रामा आफुले आफ्नै क्षेत्रका जनतालाई सर्वोपरी राखेर संसद र सरकारमा भूमिका खेलेको बताउनु भयो । ‘सांसद भएर मन्त्री भएर मैले यो क्षेत्रको लागि तपाईहरुको लागि केही गर्न सकौं भन्ने मात्र मेरो उद्देश्य हो, राजनीति गरेर व्यक्तिगत स्वार्थ लिनुछैन । शिक्षा, स्वास्थ्य, खानेपानी, कृषि, उद्यम, रोजगारीका सवालमा र भूमिहिन गरिब, विपन्न नागरिकको गाँस, बास र कपासको सुनिश्चितताको लागि पुनः एक पटक मौका दिनुहोस् ५ वर्ष काम गर्न पाए मैले गरेका प्रतिबद्धताहरु पुरा गरेरै देखाउँछु ।’ चौधरीले भन्नुभयो ।
साथै, उहाँले आफुले गर्नसक्ने मात्र प्रतिबद्धता गर्ने जनाउँदै झुट्टा आश्वासन नदिने पनि जिकीर गर्नुभयो । ‘मैले यो क्षेत्रलाई कस्तो बनाउने भनेर ०७९ सालकै निर्वाचनमा योजना बनाएको थिए, त्यसलाई पूर्णता दिनका लागि पनि तपाईहरुले यो पटक जिताउनु हुनेछ भन्नेमा पूर्ण विस्वास लिएको छु ।’ मुख्यतः ग्रामिण उद्योग मार्फत युवा स्वरोजगार, उद्यमशीलता र आर्थिक सशक्तिकरणलाई जोडेर कम्तिमा ५ हजार युवाहरुलाई आफ्नै घरमा बसेर काम गर्ने वातावरण बनाउन लाग्ने चौधरीको प्रतिबद्धता छ ।
सुनसरी ३ का भू–भागहरुलाई शिक्षा, स्वास्थ्य, कृषि, पर्यटन, उद्योग लगायतका विषयहरुसँग वर्गिकरण गरेर विकास गर्ने मोडल तयार पारेको बताउँदै भगबती चौधरीले केही ठूला उद्योगहरु स्थापना गर्नका लागि पहल भइरहेको पनि बताउनु भयो ।
अन्तरक्रियामा सहभागी प्राध्यापक, बुद्धिजिवीहरुले भगबती चौधरीलाई सिंगो देशले चिनेको र संघर्ष गरेर राजनीतिमा आएकोले पुनः जिताएर पठाउने प्रतिबद्धता जनाए । समाजसेवा, महिला सशक्तिकरण, युवा स्वरोजगार र आत्मर्निभरता आजको आवश्यक्ता भएकोले सोही अनुसार गर्न सक्ने प्रतिबद्धताहरुमात्र गरेर जनता माझ जान सल्लाह समेत दिएका छन् । कार्यक्रममा तीन दर्जन बढी समाजसेवी, बुद्धिजिवी र प्राध्यापकहरुको सहभागीता रहेको थियो ।