सुनसरी। सुनसरी निर्वाचन क्षेत्र नं. ४ मा आगामी फागुन २१ गते हुन लागेको प्रतिनिधिसभा निर्वाचन नजिकिँदै जाँदा चुनावी गतिविधि तीव्र बन्दै गएको छ।
घरदैलो अभियान, आमसभा र अन्तरक्रियामार्फत उम्मेदवारहरू मतदातासँग प्रत्यक्ष संवादमा जुटिरहेका छन्। यस क्रममा विगतका विकास कार्य, हालको अवस्था र आगामी योजनालाई लिएर क्षेत्रभर बहस चर्किएको छ।
२०७४ र २०७९ सालको निर्वाचनमा नेपाली कांग्रेसका प्रभावशाली नेता ज्ञानेन्द्रबहादुर कार्कीले जित हासिल गरेको यो क्षेत्रमा पुनः नेपाली कांग्रेसको तर्फबाट कार्की नै उम्मेदवार छन्। कार्कीका पक्षधरहरूले विगत केही वर्षमा सुनसरी–४ मा सडक सञ्जाल विस्तार, पिच सडक निर्माण तथा शिक्षा स्वास्थ्य तर्फ भौतिक पूर्वाधार निर्माणमा निकै प्रगति भएको दावी गर्छन्।
उनीहरूका अनुसार अहिले सहज आवतजावत सम्भव बनाउने सडक पूर्वमन्त्री ज्ञानेन्द्रबहादुर कार्कीको कार्यकालमा सुरु भई सम्पन्न भएका हुन्। कांग्रेसका नेता कार्कीले शुरु गरेका बहुवर्षीय योजनाहरू अझै पूर्ण रूपमा सम्पन्न हुन बाँकी रहेकाले विकासको निरन्तरताका लागि अनुभवयुक्त नेतृत्व आवश्यक रहेको धारणा राख्दै आएका छन्।
कार्कीको कुशल नेतृत्वको बखान गर्दै सो क्षेत्रका मतदाताहरु उत्साहित देखिन्छ।
संघियता आए देखि विकास निर्माण कार्यमा संघ, प्रदेश र स्थानीय तिनै तहको समन्वय आवश्यक पर्ने भएकाले यस क्षेत्र बाट कोशी प्रदेशमा दुवटा सांसद जितेको छ। त्यस्तै सबै स्थानीय तहमा समेत कांग्रेसले नै जितेको अवस्था छ। जसकारण आगामी दिनमा विकास गर्न समेत सहज हुने उनिहरुको भनाई छ।
यता अन्य राजनीतिक दलका नेताहरूले भने विकासलाई कुनै एक व्यक्ति वा दलको मात्र उपलब्धि मान्न नहुने प्रतिक्रिया दिएका छन्। विपक्षी दलहरूले सुनसरी–४ का केही बस्तीहरू अझै पनि गुणस्तरीय सडक, सुरक्षित खानेपानी, रोजगारी र प्रभावकारी सेवा प्रवाहबाट पछि परेको उल्लेख गर्दै आगामी दिनमा समावेशी र आवश्यकता आधारित विकासमा जोड दिने प्रतिबद्धता व्यक्त गरेका छन्।
स्थानीय मतदाताहरूको धारणा भने मिश्रित देखिन्छ। बराहक्षेत्र नगरपालिका–५ का स्थानीय बासिन्दा रामकुमार थापा भन्छन्, “अघिल्लो केही वर्षमा सडकको अवस्थामा सुधार भएको छ, पहिले जस्तो हिँड्न गाह्रो छैन।”
त्यसैगरी, इनरुवा–४ की मतदाता उँरावका अनुसार विकाससँगै आधारभूत सेवा पनि महत्वपूर्ण छन्। उनी भन्छिन्, “सडक त बने, तर रोजगारी र स्वास्थ्य सेवामा अझै सुधार आवश्यक छ।”
हरिनगरका युवामतदाता जमसेद अंसारीले आगामी योजनामा पारदर्शिता, जेन-जी पुस्ताको सहभागिता र स्थानीयहरुको जिवन उकास्ने हुनुपर्नेमा जोड दिए। “विकासको नाममा के भयो, के भएन भन्ने कुरा स्पष्ट देखिनुपर्छ,” उनको भनाइ छ।
निर्वाचन नजिकिँदै जाँदा सबै दलका उम्मेदवारहरू शान्तिपूर्ण रूपमा प्रचारप्रसारमा संलग्न छन्। मतदाताहरूले विगतको कार्यसम्पादन, वर्तमान आवश्यकता, जेन-जी बिद्रोहको उपलब्धि र भावी योजनाको तुलनात्मक मूल्याङ्कन गरिरहेको देखिन्छ।
सुनसरी–४ मा यो निर्वाचन केवल उम्मेदवारको प्रतिस्पर्धा मात्र नभई विकासको दिशा र प्राथमिकता तय गर्ने अवसरका रूपमा हेरिएको छ।
विकासका उपलब्धि, बाँकी चुनौती र मतदाताको अपेक्षालाई केन्द्रमा राख्दै सुनसरी–४ को चुनावी प्रतिस्पर्धा क्रमशः निर्णायक मोडतर्फ अघि बढिरहेको छ।
